నీ నిశ్శబ్దం అంచున

 ఒక మహా మృదువైన క్రూరత్వం, నీలో -

లేదా, మాటిమాటికీ

చెట్టు బెరడును గీకుతూ ఆడే

ఒక పిల్లిపిల్ల ఉత్సాహం నీలో -

ఆడుకున్నంతసేపూ ఆడుకుని, ఇక

ఆ తర్వాత, బొమ్మని

విసిరి కొట్టి వెళ్లిపోయే, ఒక పాప

నీలో; నీలోనే మరి, మహా నైపుణ్యం

కలిగిన, ఒక శస్త్ర

వైద్యురాలు కూడా! నొప్పసలు

తెలియకుండా కోత. నిలువునా, మరి

ఎంతో ఒద్దికగా, లేతగా,

గాజు ముక్కని సగానికి కోసినట్లు -

***

ఒక నిస్సహాయ క్రూరత్వం, నీలో -

ఈ ఎండమావి లోకంలో, మనుషుల్లో

ఓ జలాశయం కోసం

ఎదురుచూసే నీ ఎడారి కన్నుల్లో,

రక్కిన గీతల రాత్రుల నెత్తురుతో

ఇట్లా బెరడై మిగిలిపోయిన నాతో!