ఎక్కడినుంచో

ఎక్కడినుంచో చినుకంత మాట
నిద్రలోకి,
ఒక పసిచేయి వాలినట్టు,

మెడ చుట్టూ చుట్టుకుని, ఏదో
కలవరించి
పూవై హాయిగా నిద్రలోనే

సన్నగా నవ్వినట్టు, పెదాలపై
ఒక చుక్కై
తడితో మెరిసినట్టు కూడా!
*
ఎక్కడినుంచో చినుకంత మాట
నిద్రలోకి
రాలి, కలలై వలయాలై

ప్రేమగా నువ్వై వ్యాపిస్తో! 

అమ్మకి / 3 కవితలు

1

పగలంతా ఇలాగే గడిచిపోయింది,

గాలికై ఉగ్గబట్టుకుని

అల్లాడక వేచి చూసే ఆకులాగే

మంచం మీద ఒక్కత్తే అమ్మ, ఇక

ఏదో యోచిస్తో; మరి

కేటరాక్ట్ ఆపరేషన్ అయి, ఏమీ

చూడలేక, కళ్ళప్పుడే తెరువలేక;

ఏముంది? తన కళ్ళ

కింద? వానకు తడిచే తోటానా

లేక, నింగికెగిసే పక్షులా? చెట్లకు

వేళ్ళాడే గూళ్ళా, లేక

గోధూళి మబ్బులై వ్యాపించిన

సాయంత్రాలా? చుక్కలు చినుకులై

వెలిగే రాత్రుళ్ళా, లేక

వెన్నెల నీటిపొరైన కాలాలా?

ఏముంది ఆ కళ్ళ కింద? అసలు

ఇవేమీ కాక, తల్లి లేని

పసిపాపలే ఉన్నాయా అక్కడ?

***

పగలంతా ఇలాగే గడిచిపోయింది,

గాలికై ఉగ్గబట్టుకుని,

శిలలైన పూలతో, బాల్కనీలోనే

బంధీయైన ఒక పూలకుండీతో!
2

ఎంతో పల్చని ఎండ, ఒక పొరలా;

సవ్వడి చేయని గాలి -

ఆవరణలో తాకీ తాకని నీడలు,

త్రవ్విన మట్టికి పైగా చల్లిన నీళ్ళల్లో

తడిచిన రాళ్ళు ; మెత్తగా

అమ్మ కనులై మెరుస్తో, స్రవిస్తో,

నేలపై ఎప్పుడో రాలిన ఒక  పసుపు

ఆకు; గవ్వలాగా, మరి

శరీరంలాగా, వొళ్ళంతా గీతలతో... 

***

ఎంతో పల్చని ఎండ, ఒక పొరలా;

అక్కడే ఒక పిట్ట,

అటూ ఇటూ మరి తచ్చాట్లాడి,

చిన్నగా, ఎటో ఎగిరే పోయినట్టు

మరి అమ్మకి తప్ప

ఇంకెవరికీ, ఎందుకో అసలు 

మరి తెలియనే రాలేదు!

|| ఎలా/ ఒక ౩ కవితలు ||

1

ఎలా ఉన్నావు అని అడగాలని ఉంది

నిజంగానే,

నా నెత్తురునంతా మాటల్లోకి వొంపి,

ఊరికే, నీ పక్కన కూర్చోవాలని ఉంది

నిజంగానే,

ఏమీ మాట్లాడకుండా, నిన్నానుకుని

చిన్న నవ్వుతో నిన్ను వినాలని ఉంది

నిజంగానే,

శరీరం నిండుగా నిన్ను పీల్చుకుని,

ఎటో దారి తప్పి పోవాలనే ఉంది నీతో

నిజంగానే,

నన్నేను మరచీ, మరోసారి బ్రతికీ,

హా; నిజం. మరోమారు మరణించాలనే

ఉంది నీలో,

ఒక మెలకువలోకి పూర్తిగా మేల్కొని,

***

చూడూ; ఇప్పటికైతే ఇదే మరి సత్యం,

ఎలా ఉన్నావు అని అడగాలని ఉంది

నిజంగానే,

నిన్నొకసారి, ఎంతో గట్టిగా హత్తుకుని!

2

ముద్ధ గులాబీ పూవువా నువ్వు?

అని అడిగాను,

నడిరాత్రి ఒక చంద్రబింబాన్ని

వెన్నెల వాసనివా నువ్వు? అని

కూడా అడిగాను,

వేకువఝామున ఒక మంచుని

సరస్సుల స్వప్నానివా నువ్వు ?

అని అడిగాను,

తీరాన ఆగిన ఒక కాంతి నావని

చినుకులు రాలే కాలనివా నువ్వు ?

అని కూడా మరి  

అడిగాను ఆ పూలమేఘాన్ని,

ఇక ఏమీ అడగలేక, ఇలా వ్రాసాను

 తనకి; నా శ్వాస 

రహస్యానివి కదా నువ్వు? 

3

బహుశా

ఇదే దారిలో పోవాలి, బహుశా

చేతిలో ఒక చీకటి దివ్వెతో
లోపలెక్కడో
ఓ శిశువు రోదిస్తోన్న

ప్రకంపనలతో, వలయాలతో
నీతో, బహుశా
తప్పక, ఇదే దారిలో!

report

how am i? నేను ఎలా ఉన్నానా? సాంధ్యచ్చాయలో మబ్బులు ముసిరి వీచే హోరు గాలిలో ఇంటికి వెనుక నిమ్మ చెట్టు పక్కగా దండేనికి, ఒకటే కొట్టుకులాడుతోంది వాన రంగులాంటి అమ్మ చీర: ఆ విసురుకి, మరి ఇక ఎపుడో, ఆ నిమ్మ ముళ్ళకి చిక్కుకుని చీర, చినుకులుగా చీరిపోవచ్చు; మబ్బు తెగిన వాసన వేయవచ్చు: ఎవరూ తొలగించక మరి నాని, ఆ దండేనికే రాత్రై, ఒక్కతే వణుకుతుండవచ్చు మిణుకుమిణుకుమనే నక్షత్రాల కింద ఏదో భాషలో, తడిచిన బరువుకి మూల్గుతుండనూ వచ్చు! *** how am i? ఎలా ఉన్నానా నేను? అమ్మ లేని ఇల్లు: మగ్గిన వాసన వేసే పగుళ్లిచ్చిన గోడలు; ఆవరణ అంతా చెదురుమదురుగా రాలి నిండా తడిచిన వేపాకులపైగా కుంటుకుంటో మరి బావురుమంటో తిరుగుతోంది ఎందుకో ఒక ఊదారంగు పిల్లిపిల్ల!