మొదలు

నా చుట్టూతా ఒక తెమ్మర, ముఖమల్
వస్త్రమేదో చుట్టుకున్నట్టు -
సాయం సంధ్య. పల్చటి కాంతి -

తిరిగి వచ్చే సవ్వడి ఆకాశమంతటా -
వాటి రెక్కల్లోనెమో అలసట
గొంతుల్లో, పిల్లనగ్రోవులై ఇళ్ళు -

ఇక చీకటి పడుతుంది. ఎక్కడో ఏదో
స్థిమిత పడుతుంది. దీపం
ఒకటి వెలుగుతుంది, చిన్నగానే -
***
లోపలెక్కడో, గూడు చేసుకుని ఎవరో
చిన్నగా పొదిగే చోట, ఒక
కదలిక. తల తిప్పి చూస్తానా, మరి

అక్కడే, తలెత్తి చూస్తూ నువ్వు!