అదే నేను

అదే కిటికీ, అదే కుర్చీ, అదే రాత్రి కాని రాత్రి-
ఆకులేవో ముడుచుకుని
తేమను చిలుకరించినట్టు.

అప్పుడు, నీకు నువ్వే విసుగు పుడతావు-
నీ నీడా నీకు సాంత్వన ఇవ్వదు
దాని కళ్ళలోనూ ఒక బుగులు-

ఇల్లు మరచి, దారి తప్పి, వాహనాల మధ్య
అటూ ఇటూ బెదురు బెదురుగా
తిరుగాడే, ఒక కుక్క కనులను

చూసావా ఎన్నడైనా? ఒక దిగులుతో, తనది
కాని, ఒక స్థలంలో ఇరుక్కుపొయి
తిరిగి ఇంటికెలా వెళ్ళాలోతెలియక

ఏ వాహనం కిందో పడి కాలో కడుపో
తెగి, పేగులు బయటపడి కదలలేక
ఏడ్చే  కుక్కను, చీకట్లో దాని ఊళనూ?

మరేం లేదు. ప్రస్థుతానికి అదే నేను-