చిత్తు ప్రతి

నువ్వు వెళ్ళిపోయి మిగిల్చిన 

గొప్ప దిగులు ఇక్కడ -
***
అప్పటికి, నువ్వింకా రాలేదు -
పూవులు ఏరి
దాచి ఉంచాను నీ కోసం ...

కిటికీ తెరలలో తెల్లని కాంతి -
నేలపై ఊగే
నీడలు, హృదయ ఛాయతో!

బయట గాలిలో, ఆకులు
వేలపిట్టలై
ఉన్నచోటే ఎగిరే చప్పుడు ...
***
తెలుసు నాకు, తెలుసు నాకు
పద్యాన్ని పొదిగే
స్వప్నకాలం ఇది కాదని -
***
నువ్వు వెళ్ళిపోయి మిగిల్చిన
గొప్ప కోత ఇక్కడ ...
***
ఇప్పటికీ, నువ్వింకా రాలేదు -
***
బయట, చిరుగాలిలో ఎవరో
చినుకుల్తో రాలి
చిట్లిపోతున్న చప్పుడు ...
***
నిజం -
పూలు ఏరడం నేరం అనీ
అతని హృదయం
నీకొక చిత్తు ప్రతి అనీ
అతనికింకా

ఇప్పటికీ తెలియనే లేదు!
***
ఏమీ లేదు -
నువ్వు మళ్ళా వచ్చి, మళ్ళా
వెళ్ళి మిగిల్చే
హత్యలే, లోపలంతటా!

vignettes

1

కొంచెంసేపు వర్షం కురిసి, మరి

ఆగిపోయింది -

నా చుట్టూతా ఇక, కొలవలేని

ఒక నిశ్శబ్దం;

ప్చ్; నువ్వెప్పుడూ ఇంతే!

2

కదలక నిశ్చలంగా చెట్లు; కూడా

మరి రాత్రీ, ఆకాశం -

గాలిలో తేమ ఏదో పలువరిస్తోంది -

చెప్పు నాకు, నీ పేరేనా అది?

3

బాల్కనీ అంతా వాన వాసన -

రాత్రంతా ఆకాశం

ఇక్కడ కక్కుకున్నట్లు!

తడచి ముద్ధయ్యి, వొంటరిగా

చూడు, చూడు ...

ఓ పూలకుండీ, ఓ కవితా

వాటిని వ్రాసే ఈ మనిషీ!

4

తడచిన చెట్ల నల్లటి బెరడు

అతనికి, ఆమె

శరీరాన్ని జ్ఞప్తికి తెస్తాయి;

తన శరీరపు వాసననీ, తేమనీ

చివరిగా పోటెత్తే

వర్షాన్ని కూడా! ఇక మరి

అతనిలో ఆకస్మికంగా, లక్షల

ఆకులు, నిప్పుతో

రెపరెపలాడుతోన్న సవ్వడి!

5

వీధి దీపాలు కొట్టుకులాడతాయి

చల్లటి గాలి అల ఒకటి

అతనిని చరచి వెళ్ళిపోతుంది -

ఎప్పటిలాగే అతనొక్కడే అక్కడ

దీపస్తంబం కింద

వొంటరిగా; ఎదురుచూస్తో -

6

వర్షం కురిసి, చీకటి ఛారికను

వొదిలి వెళ్ళింది;

మెరుస్తో ఈ రహదారులు -

గాయపడి, వ్యాఘ్రం వలెనో,

హృదయంవలెనో

గర్జిస్తో మరీ రాత్రీ, చీకటీ!

నెత్తురోడుతో అడుగుతాడు

అతను: ఎటు

మనం అనే గూటికి దారి?

7

అతను, ఒక దీపాన్ని స్వప్నించాడు

ఒక పరిమళాన్నీ,

జీవితంలా, వాన చినుకులా

ఒక కవితలా లేక అచ్చు ఆమెలాగా

జ్వలించే ఒక

దీపశిఖనీ కలగన్నాడు; మరి

సరిగ్గా ఘడియలోనే, ఎప్పటిలాగానే

ఎవరో ఎక్కడో

ఎందుకో, అతనికి నిశ్శబ్దంగా

అంతిమ వీడ్కోలు పలుకుతారు!

8

వర్షంలో తడచి, ఇళ్ళన్నీ నిశ్చలంగా

నిలబడి ఉన్నాయి;

వాటన్నిటిలోనూ ఒక శాంతి భావన,

అరతెరచిన నోర్లతో అలా నిదురిస్తున్న

శిశువుల వలే

ఉన్నాయి అవి; అవే, ఆ ఇళ్ళు!

మరి మనం కూడా కలతలు లేని ఒక

నిద్రకి అర్హత

పొంది ఉన్నాం అని అనుకుంటా;

అదెంత క్షణికమైనా! అనంతమైనా!

9

మబ్బులు తొలిగిపోయాయి; ఇంకా

చీకటిగానే ఉంది,

అయినా కొన్నిటిని నువ్వు

చూడగలవు; రబ్బరు చెప్పులతో

ఇంటికి పరిగెత్తుకెళ్ళే

ఓ పిల్లవాడినీ, ఆ చప్పుళ్ళనీ,

వేచి చూసే అతని తల్లినీ, ఇంకా

వీధిలో ఆగిన

మొక్కజొన్న బండ్లపై రాజుకునే

నిప్పునీ, పొగనీ, ఏవేవో మాటలనీ!

పర్వాలేదు, ఇది

బానేవుంది: నువ్వు ఇచ్చిన

నిలుపుకోలేని వాగ్దానం వలెనే!

_______________

*అనుసృజన

vignettes

1

It rained for a while, and then

it stopped; 
there is a silence that 

one can neither understand 
nor measure!

You always do this to me!

2

The balcony reeks of rain!

As if the sky

has vomited the night!

Drenched, all alone, look -

A flowerpot 

A man and this poem!

3

The dark bark of the trees

reminds him

of her skin; the smell

the moisture and the rain

of her body;

Suddenly, a thousand 

leaves flutter in his heart! 

4

The street lamps flicker;

A wave of breeze

hits him and then recedes.

As always, he stands there

all alone, 

under the tree; waiting!

5

The rain has left a trail 

of darkness;

Roads glistened;

And the night roared like

a wounded 

tiger; Or a heart! 

Bleeding, he asks, tell me

which way 
leads to our home?!

6

He dreamt of a lamp; Of

Perfume; of

A flame that shone

like life; like a rain drop;

like a smile;

Like a poem; Or you! 

It is just then that, someone

somewhere 
says the final goodbye!

7

Soaked in the rain , the houses

stand motionless;

there's a certain sense 

of peace about them; they look 
like kids asleep 
with mouths agape! I think 

we too have earned this sleep

tonight; though

It may be, for a short while! 

ధ్వని, 3 కవితలు

1

|| ప్రతిధ్వని ||

నీ చేతులు వానని జ్ఞప్తికి తెస్తాయి,

వాన తడిపిన మట్టినీ

మట్టి తడిచిన ఆ సువాసననీ -

నీ మాటలేమో రాళ్ళని రుద్దుకుని

సాగే నీటి పాయలు -

ఎంతటి అందమైన శబ్దం అది!

'రంగుల శబ్దంవి కదా నువ్వు' అని

అన్నాను నేను నీతో,

వానేదో రాత్రేదో తెలియని రోజు!

***

ఇప్పుడు చూడు; వానాగిపోయాక

వీధి దీపాల కాంతిలో,

నా చట్టూతా మార్మ్రోగుతున్న

రాలిన ఆకుల మహానిశ్శబ్దం!

2

|| ఎన్నడైనా ||

నువ్వో ఉత్తరం వ్రాస్తావా నాకు?

ఎన్నడైనా?

అందుకే ఎదురు చూస్తాను,

ఇక్కడ; ప్రియమైన ఈ రాత్రి వద్ద

పొరల పొరల గాలితో,

చీకట్లో, చుక్కల వర్ణమాలతో!

( మరి ఎందుకు అలా అంటే)

ఎదురు చూడటమే కదా ఎవరైనా

చేయగలిగినది,

ముఖ్యంగా ఈ మూగకాలంలో!

***

అవతల ఎక్కడో, ఎగుడు దిగుడు

మైదానాలలో, అట్లా

వానకు తడిచే చెట్లు శోకించేది

ఏమిటో, మరి ఎవరికి తెలుసు?

3

|| పాత కుర్చీ ||

వానకి తడిచిపోయింది

వరండాలోని

పాత వెదురు కుర్చీ,

దాని నుంచి రాత్రంతా

మక్కిన వాసన,

బహుశా చీకటిదేమో ...

బద్దలు చీలిపోయి,మరి

కొన్ని విరిగీ,

గోడకి అట్లా ఆ కుర్చీ...

***

తెల్లవారింది; అయినా

అతనినెవరూ

పలకరించనే లేదు!

|| communication, 3 కవితలు ||

|| నో నెట్వర్క్ ||

బహుశా, తలుచుకోవు నన్ను నువ్వు -

ఎప్పటిలాగే నువ్వు

నీ లోకంలో, నీ cellలో తప్పిపోయి ..

మరి, ఇక్కడా అంతకన్నా మెరుగుగా

ఏమీ లేదు; నేనూ,

లోయలాంటి ఎండా, సుళ్ళు తిరిగే

గాలికి ఎగిరే చిత్తు కాగితాలూ, దుమ్ము

వీధి చివర ఆగిన

కారు కింద నీడలో, రొప్పే కుక్కలూ

నిటారుగా, లోహ మృగాలై వేచి చూసే

షాపింగ్ mallలూ,

బహుళ అంతస్థులూ, antennaలూ ...

***

బహుశా, తలచుకోవసలే నువ్వు నన్ను

ఏ Instagramలోనో,

youtubeలోనో మరి నిండా మునిగి -

పో పో; ఏమ్ స్విచ్చింగాఫ్ దిస్ ఫోన్!

|| బంధీ ||

నేను నీకొక laptopని; ఊరికే

మీటలు నొక్కి

ఏవో దృశ్యాలను తెరచి, నీ

ఖాళీ సమయం గడిపేందుకూ

కాలక్షేపంకై

వినోదం చూసేందుకూ;

అంతే, అంతకుమించి ఏమీ

లేదు; బ్రతుకో

నిరంతర వార్తాప్రసారం,

whatsappలో బంధీ అయిన

శరీరం, ఒక

పోర్న్ సైట్, రాత్రుళ్ళు

చూసే క్రైంపెట్రోల్, ఫైనల్లీ

my బేబీ, నేను

నువ్వాడుకునే ఓ బొమ్మ;

ఓ dildo! అంతే!

|| loneliness of a dog ||

ఎవరూ లేరు, అందరూ ఉండి; నువ్వూ

నీ జీవితం వలయం చుట్టూ

ఒక oppo, ఒక redmi A1, Jioతో కలిసి ...

రాత్రి; అకాల వర్షం వెలిసి మిగిలే తేమ,

జిగటగా, ఇరుకుఇరుకుగా;

నేలపై నీడల్లో ఎవరో ఎందుకో చిట్లితే,

తడుముకునే చేతుల్లోకి domino's పిజ్జా

నువ్వు; ఒక mc donald's

burgerవి, ఒక cokeవీ, ఒక నిషా, ఒక

whatsappవి మాత్రమే నువ్వు; ఫేస్బుక్లో

మాత్రమే పొంగి పొర్లే,

స్పర్శ లేని దేహంలేని ప్రేమ నువ్వు,

గుప్పెడు అన్నం కానీ, తాకగలిగే మాట

కానీ, జీవజలం కానీ కాలేని,

ఇల్లు ఓ Homeshop18వి ఐన నువ్వు!

***

అందరూ ఉండి ఎవరూ లేరు; ఎక్కడో

చీకట్లో ఓ కుక్క, మోరెత్తి

ఏడుస్తో, ఆనక ఆగి ఆగి మూలుగుతో -

ఇక ఇవే ఈ రాత్రికి తోడు: ' Hi from Dr

C! Health Check @ HOME

61 tests, Rs 849 only. Just 10 min'

'మీరు, వొంటరిగా ఉన్నారా? అయితే

కాల్ చేయండి 54565కి'

'Mr. Reddy we've a loan offer of ...'

మాటిమాటికీ స్క్రీన్ను స్క్రాల్ చేసే ఈ

బొటనవేలు, గొంతు తెగేలా

అరుస్తోన్న ఒక naaptol అమ్మాయి!

|| ఇక్కడ ... ||

1

రెండు ఖాళీ అరచేతులంత చీకటి
ఒక రెక్క తెగి,
కిటికీ అంచుకు వేలాడే సీతాకోకై,
2
ఊచలే ఇప్పటికి మిగిలిన వాస్తవం
బంధీ అయినది
ఏమిటో ఎవరో కూడా తెలియదు,
3
పగిలిన ఓ కుండై ఈ రాత్రి ఆకాశం
అడగకు ఇక, 
చుక్కలు మరి ఎవరి అశ్రవులని,
4
పెగిలీ పెగలని గాలి గొంతు; వొణికీ
గుక్కపట్టీ, అది 
పాడే పాట లోపలో మృత్యువైతే,
5
ఇదే సత్యం ఇప్పటికీ; నిను  తలచి
తెగి, నేల రాలి 

దేనికిందో చితికి, నుజ్జునుజ్జయి ...

|| ఉనికి ||

ఎంతో పల్చని ఎండ, మరి ఓ పొరలా;
సవ్వడి చేయని గాలి -
ఆవరణలో తాకీ తాకని నీడలు

త్రవ్విన మట్టికి పైగా చల్లిన నీళ్ళల్లో
తడిచిన రాళ్ళు; మెత్తగా
అమ్మ కళ్ళలాగా మెరుస్తో స్రవిస్తో

నేలపై ఎప్పుడో రాలిపడినో పసుపు
ఆకు; గవ్వలాగా, మరి
ఒక శరీరంలాగా, ముడుతలతో ...
***
ఎంతో పల్చని ఎండ, మరి ఓ పొరలా;
అక్కడే ఒక పిట్ట, 

అటూ ఇటూ ఎంతో తచ్చాట్లాడి

చివ్వున ఎటో అట్లా ఎగిరేపోయినట్టు
అమ్మకి తప్ప ఇంకెవరికీ 
మరి, ఎందుకో తెలియనే లేదు!