నీకై 7*

నవ్వుతున్న గాడిదలను చూసావా ఎపుడైనా?

రూకల గార పట్టిన పళ్ళతో 

నవ్వుతారు ఈ జనాలు    

నేను నిన్ను తలచుకున్నప్పుడల్లా 

అంటాను నేను వాళ్ళతో 

తెల్లటి కాగితాలైతే రాసుకోవచ్చు, ముఖం చూసుకోవచ్చు 

ప్రేమించలేని, రమించలేని

శరీరాలు లేని ఈ పచ్చటి కాగితాలతో ఏం చేయగలం

విసర్జించాక తుడుచుకోవడం తప్ప? 

అందుకే నవ్వుతారు, ఖ్యాతికై 

దాచుకునే భవంతులకై 

బంగారానికై  వెంపర్లాడే 

ఈ లోకపు మహా పిసినారి గాడిదలు-

నిన్ను మించిన పసిడీ 

నిన్ను మించిన భవంతీ

నిన్ను మించిన ఖ్యాతీ పుణ్యం స్వర్గలోకం ఉంటుందా ఎక్కడైనా?

ఫరీదా ఇక ఇంతకంటే 

మరి ఎక్కువ చెప్పడం 

నిషిద్ధం: ఎందుకంటే 

విత్తనంలో చిక్కుకున్న చిగురాకు

చినుకుకై పడే తపనా పెనగులాటా 

నీకూ నాకూ తప్ప 

మరెవరికి తెలుసు?