ఇప్పటికైతే….

ఎలా ఉన్నావు అని అడగాలని ఉంది

నిజంగానే,
నా నెత్తురినంతా మాటల్లోకి వొంపి

ఊరకే, నీ పక్కన కూర్చోవాలని ఉంది
నిజంగానే,
ఏమీ మాట్లాడకుండా, నిన్నానుకుని

చిన్న నవ్వుతో నిన్ను వినాలని ఉంది
నిజంగానే,
శరీరం నిండుగా నిన్ను పీల్చుకుని

ఎటో దారి తప్పి పోవాలనే ఉంది నీతో
నిజంగానే,
నన్నేను మరచీ, మరోసారి బ్రతికీ

హా; నిజం. మరోమారు మరణించాలనే
ఉంది నీలో,
ఒక మెలకువలోకి పూర్తిగా మేల్కొని ...
***
చూడూ; ఇప్పటికైతే ఇదే మరి సత్యం 

ఎలా ఉన్నావు అని అడగాలని ఉంది
నిజంగానే,
నిన్నోసారి ఎంతో గట్టిగా హత్తుకుని!